दक्षता जनजागृती सप्ताह :लाचलुचपत प्रतिबंधक विभागामार्फत जानेवारीपासून ११५ लोकसेवकांविरुद्ध कारवाई; जनजागृतीवर भर

 

छत्रपती संभाजीनगर,दि.१(जिमाका)- लाचलुचपत प्रतिबंधक विभागातर्फे दि.३० ऑक्टोबर ते ५ नोव्हेंबर याकालावधीत   दक्षता जनजागृती सप्ताह साजरा करुन भ्रष्टाचाराविरुद्ध विविध उपक्रमांतून लोकांमध्ये जनजागृती केली जाते. दरम्यान विभागाने जानेवारी ते ऑक्टोबर दरम्यान ११५ लोकसेवकांविरुद्ध कारवाई केली आहे. लोकसेवकांकडून आपले कामकाज करुन घेतांना लाचेची मागणी होत असल्यास नागरिकांनी निर्भयपणे लाच लुचपत प्रतिबंधक विभागाकडे संपर्क साधावा. त्यासाठी लाचलुचपत प्रतिबंधक विभागाने १०६४ हा टोल फ्री क्रमांकही जारी केला आहे.

लाचलुचपत प्रतिबंधक विभाग छत्रपती संभाजी नगर अंतर्गत छत्रपती संभाजीनगर, जालना, बीड, धाराशिव या जिल्ह्यांचाही समावेश होतो. या संपूर्ण जिल्ह्यांमध्ये हे जनजागृतीपर उपक्रम राबविण्यात येत आहे.जानेवारी ते ऑक्टोंबर २०२३ या  कालावधीत लाचलुचपत प्रतिबंधक विभागाने नागरिकांनी केलेल्या तक्रारीवरुन लाचखोरांविरुद्ध कारवाई केली आहे. त्यात ११५ लोकसेवकांचा समावेश आहे. त्यात वर्ग १- चे एक, वर्ग २ चे २२, वर्ग ३ चे ८०, वर्ग ४ चे १४ अन्य लोकसेवक २२ आणि खाजगी व्यक्ती २२ यांचा समावेश आहे.

दक्षता जनजागृती सप्ताहात विविध कार्यक्रमांचे आयोजन

दक्षता जनजागृती सप्ताहानिमित्त दि.३० ऑक्टोंबर रोजी भ्रष्टाचार निर्मूलनाची शपथ घेऊन या सप्ताहाची सुरुवात करण्यात आली. यानिमित्त हस्तपत्रके वाटणे, पोस्टर्स,स्टिकर्स याद्वारे जनजागृती करुन माहिती दिली जात आहे.जिल्ह्यात ठिकठिकाणी शाळा महाविद्यालयांमध्ये  विद्यार्थ्यांना मार्गदर्शन करुन त्यांच्यात भ्रष्टाचाराविरुद्ध जागरुकता निर्माण केली जात आहे. हे उपक्रम दि.५ पर्यंत सुरु राहणार आहेत.

नागरिकांनी १०६४ वर कॉल करावा

लोकसेवकांकडून लाचेची मागणी होत असल्यास नागरिकांनी १०६४ वर कॉल करावा, असे आवाहन लाचलुचपत प्रतिबंधक विभागाचे पोलीस अधीक्षक संदीप आटोळे यांनी केले आहे. हा क्रमांक २४X ७ सुरु असतो. लाचलुचपत प्रतिबंधक विभागाकडे  तक्रार केल्यास भ्रष्टाचारी लोकसेवक पकडले जाऊन त्यांना न्यायालयातून शिक्षा होते. नागरिकांनी केलेल्या तक्रारी संदर्भात पूर्ण गुप्तता पाळली जाते.  अधिक माहितीसाठी लाचलुचपत प्रतिबंधक विभागाचे पोलीस अधीक्षक संदीप आटोळे- ९९२३०२३३६१, उपअधीक्षक राजीव तळेकर-९८२३४९८७७७, दिलीप साबळे-९५४५९५०४२१, गोरखनाथ गांगुर्डे-९५०३७३६३५१, श्रीमती संगिता पाटील-८७६६७५५५१५.

०००००